Os ydych yn gosod drws newydd, manteisiwch ar y cyfle i wella eich diogelwch trwy osod drws a thystysgrif Brydeinig PAS 24-1 ‘Doors of Enhanced Security’.

Gofynnwch am osod cadwyn neu far arno, a thwll sbecian os nad oes ffenestr neu ffordd arall o edrych i weld pwy sydd wrth y drws.

Mae paneli gwydr ar ddrysau neu o’u hamgylch yn arbennig o agored i niwed, felly gosodwch wydr laminedig yn eu lle. Neu gallwch brynu ffilm arbennig i’w lynu ar y tu mewn a fydd yn gwneud yr un peth.

Gwnewch yn siŵr fod y drysau a’r fframiau yn gryf ac mewn cyflwr da. Dylai drysau pren fod yn soled ac o leiaf 44mm (13/4”) o drwch.

Gosodwch gloeon mortais pum-lifer (nod barcud BS3621) ar bob drws allan, gan gynnwys drysau Ffrengig. A gwnewch yn siŵr eich bod yn eu defnyddio.

Gallwch gryfhau drysau pren trwy osod stribyn a phlatiau dur ar ffrâm y drws ac o gwmpas y clo.

Clowch y drysau hyd yn oed pan fyddwch gartref. Defnyddiwch y clo mortais neu, ar ddrysau PVC-U neu ddrysau eraill a diogelwch uwch, y modd llwyr gloi neu gloi dwbl, yn arbennig yn ystod y nos.

Gosodwch folltau mortais ar dop a gwaelod pob drws allan, gan gynnwys y ddwy ochr i ffenestri Ffrengig.

Cofiwch osod sgriwiau neu folltau cryf ar bob dyfais diogelwch.

Cyn gosod cloeon ar ddrysau PVC-U neu fetel, holwch y sawl a’u gosododd i wneud yn siŵr na fydd hyn yn effeithio ar y warant.

1. Twll Sbecian
   Os nad oes gennych ffenestr yn y drws neu ryw ffordd arall o edrych i weld pwy sy’n galw, gosodwch dwll sbecian.
   Edrychwch drwy hwn i adnabod pobl sy’n galw cyn agor y drws.
   
   
2. Colynnau
   Gwnewch yn siŵr fod colynnau drysau yn gadarn a sgriwiau hir, cryfion yn eu dal yn eu lle. Gosodwch folltau colyn er mwyn diogelwch ychwanegol. Mae’r rhain yn rhad i’w prynu ac yn helpu i atgyfnerthu ochr colyn y drws. Mae bolltau colyn neu golynnau diogelwch yn arbennig o bwysig os yw drws yn agor ar i mewn.
   
   
3. Bocsys Llythyrau
   Peidiwch byth a hongian allwedd sbâr tu mewn i’r bocs llythyrau. Dyma le amlwg y bydd lleidr yn siŵr o edrych. Dylai bocsys llythyrau fod o leiaf 400mm (16 medfedd) oddi wrth unrhyw gloeon. Ystyriwch osod cawell dal llythyrau neu gyfyngiad arall, sy’n rhwystro lladron rhag rhoi eu dwylo drwy’r blwch llythyrau a cheisio agor y cliciedi o’r tu mewn.
   
   
4. Clicied Ymyl
   Mae clicied ymyl ar y rhan fwyaf o ddrysau ffrynt, sy’n cloi yn awtomatig wrth i’r drws gael ei gau. Gallwch agor y rhain o’r tu mewn heb allwedd. Chwiliwch am gynnyrch a’r nod barcut BS3621 er mwyn cryfder ac ansawdd. Dylech ystyried gosod y canlynol er mwyn diogelwch ychwanegol.
   
   
5. Llwyrglo Awtomatig
   Mae hwn yn cloi’n awtomatig wrth i’r drws gael ei gau ac yn fwy diogel na mathau eraill o glicied ymyl. Rhaid cael allwedd i’w agor o’r tu mewn a’r tu allan hefyd.
   
   
6. Cadwyni a Thyllau Sbecian
   Prynwch far neu gadwyn drws a thwll sbecian. Defnyddiwch nhw bob tro mae rhywun yn galw. Ons cofiwch mai dim ond wrth ateb y drws y dylid defnyddio cadwyn neu far drws - peidiwch â’i adael ymlaen drwy’r amser.
   
   
7. Llwyrglo Mortais
   Gosodwch lwyrglo mortais pum-lifer tua un than o dair o’r ffordd i fyny’r drws. Mae’r rhan fwyaf o gwmnïau yswiriant yn fodlon ag un a nod barcut Safon Brydeinig BS3621. Rhaid cael allwedd i agor llwyrglo, ac felly fydd lleidr ddim yn gallu chwalu’r panel wydr cyfagos i agor y drws o’r tu mewn. Ac os bydd byrgleriaid yn dod i mewn i’ch cartref drwy ffenestr, ni fyddant yn gallu cario eich eiddo allan drwy’r drws, os oes llwyrglo arno.
   

Os byddwch yn symud i gartref newydd, newidiwch y cloeon drws ar y drws ffrynt a’r drws cefn yn syth - efallai bod gan bobl eraill allweddi sy’n ffitio. Edrychwch yn eich llyfr ffôn am ofaint cloeon lleol sy’n aelodau o Gymdeithas y Pen Ofaint Cloeon.

Peidiwch byth a gadael allweddi eich cartref neu eich car mewn drws neu’n agos at y drws neu ffenestr. Mae storiâu am rai lladron yn defnyddio gwialen bysgota neu fagnet ar damaid o bren i’w dwyn drwy flychau llythyrau.

Penderfynwch ar le diogel i’ch allweddi a’i ddefnyddio pob amser, fel y gallwch ddod o hyd iddynt mewn argyfwng.

Fwy a mwy, mae byrgleriaid yn torri i mewn i ddwyn allweddi ceir gwerthfawr. Felly cymerwch ofal o’ch allweddi, ac os oes gennych garej, cadwch eich car yno yn hytrach nag ar y dreif.

Os Ydych Yn Byw Mewn Fflat
Yn aml, nid yw drysau fflatiau unigol mor gryf â drysau tai a dyna’r ffordd hawsaf i leidr dorri i mewn.

Dylid gosod mecanweithiau cloi yn unol â BS5588 Rhan 1:1990 ‘Fire Precautions in the Design and Construction and Use of Buildings’ ar ddrysau fflatiau a lefel llawr o 4.5 metr (fel arfer y rhai hynny ar yr ail lawr neu’n uwch).

Mynedfeydd Sy’n Cael eu Rhannu
Ystyriwch osod system mynediad-ffôn wrth brif ddrws eich adeilad. Peidiwch byth a defnyddio’r ‘seiniwr’ i agor y drws i ddieithriaid na dal y drws yn agored i rywun sy’n cyrraedd wrth i chi adael neu fynd i mewn i’r adeilad.

Cofiwch

Gloi – clowch eich drysau a ffenestri, hyd yn oed pan fyddwch gartref.

Aros - ydych chi’n disgwyl rhywun - a oes ganddynt apwyntiad? Gwnewch yn siŵr fod y drws cefn wedi ei gloi - bydd rhai lladron yn gweithio mewn parau ac un yn sleifio i mewn drwy’r cefn tra byddwch chi wrth y drws ffrynt.

Cadwyn – rhowch y bar neu’r gadwyn ar y drws cyn ei agor.

Gwirio - gwiriwch pwy ydynt yn ofalus. Gofynnwch am gerdyn adnabod. Caewch y drws a gwirio trwy ddefnyddio rhif ffôn o’r llyfr ffôn neu fil perthnasol, nid y rhif ar y cerdyn.

Os ydych yn amheus, cadwch nhw allan, yn arbennig os ydych ar eich pen eich hun. Gofynnwch iddynt wneud apwyntiad neu alw’n ôl nes ymlaen pan fydd rhywun o gwmpas. Fydd galwyr diffuant ddim dicach. Os ydych yn amheus, rhowch wybod i’r heddlu am y digwyddiad. Gallech helpu i’w hatal rhag bwrglera rhywun arall.

Am ddiogelwch ychwanegol yn eich cartref, dilynwch ein cyngor, efallai fe wneith eich arbed rhag bod yn ddioddefwr byrgleriaeth:

(source - Home Office)